नबिल बैंकबाट आइएफआइसी नबाहिरिने, सेयर बिक्री प्रक्रिया स्थगित

नबिल बैंकमा आईएफआइसी बैंकको नाममा रहेको सेयर बिक्री प्रक्रिया स्थगित भएको छ।

नबिल बैंकको सञ्चालक समितिको शनिबार बसेको बैठकले संस्थापक सेयर खरिद बिक्री स्थगित भएको विषय नियामकलाई जानकारी गराएको छ ।

तत्कालीन नेपाल बंगलादेश (एनबी) बैंकको विदेशी लगानीकर्ता आईएफआईसी बैंकले नबिल बैंकमा कायम सेयर नबेच्ने भएको हो । नबिल बैंकले एनबी बैंक प्राप्ति गरेपछि आईएफआईसीले आफ्नो स्वामित्व रहेको सेयर बिक्री गर्ने गरी नेपाल राष्ट्र बैंकमा निवेदन दिएको थियो ।

नबिल बैंकले नेपाल धितोपत्र बोर्ड र नेपाल स्टक एक्स्चेन्जलाई बैंकको हाल कायम विदेशी लगानीकर्ता आईएफआईसी बैंकको नाममा रहेको संस्थापक सेयर खरिद/बिक्रीको प्रक्रिया स्थगन भएको जानकारी गराएको छ ।

नबिलमा आईएफआईसीको १ करोड ७७ लाख ३६ हजार ८८ कित्ता र सोबाट आर्जित बोनस सेयर कायम छ ।नबिल बैंकमा आइएफआईसीको सेयर स्वामित्व ७.७७ प्रतिशत रहेको छ । तत्कालिन नेपाल बंगलादेश(एनबी) बैंकमा आइएफआईसी लगानी गर्न आएको थियो ।

नबिल बैंकमा रहेको रहेको आइएफआईसीको सेयर बिनोद चौधरीको परिवारले किन्ने सहमति भएको थियो । राष्ट्र बैंकले सेयर खरिदबिक्रीको अनुमति लामो समयसम्म नदिएपछि सेयर खरिदबिक्रीको प्रक्रिया अहिलेको लागि पूर्ण रुपमा स्थगित भएको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।