सुन तस्करी प्रकरणमा सीआईबीको दोस्रो प्रतिवेदन: ५ कम्पनीमार्फत ३० अर्ब ८२ करोडको ३१ सय ९४ किलो सुन तस्करी

नेपाल प्रहरीको केन्द्रीय अनुसन्धान ब्यूरोले सोमबार पत्रकार सम्मेलन गरेर गत वर्ष साउनमा त्रिभुवन विमानस्थल भन्सारमा समातिएको अवैध सुनको थप तथ्य सार्वजनिक गरेको छ ।

ब्यूरोका अनुसार तस्कर समूहले विभिन्न ५ वटा नक्कली कम्पनी खडा गरेर ३० अर्ब ८२ करोड २२ लाख मूलय बराबरको ३१ सय ९४ किलो सुन तस्करी गरेको जनाएको हो ।

सीआईबीले यस प्रकरणमा थप २० जनालाई पनि पक्राउ गरेको छ । पक्राउ पर्नेमा २ चिनियाँ नागरिक पनि छन् ।

पक्राउ परेकाहरूलाई संगठित अपराध, सुनको अवैध तस्करी लगायतमा सजाय माग र २ खर्ब ६६ अर्ब ६७ करोड रुपैयाँ बिगो दाबी पनि गरिएको छ । पक्राउ परेका २० र फरार रहेका २६ गरी ४६ जनालाई सीआईबीले प्रतिवादी बनाएको छ ।

सीआईबीले उक्त अवैध सुनको भुक्तानी प्रक्रियामा संलग्न भएको भन्दै नेपालका दुईवटा पेमेन्ट गेटवे पेवेल नेपाल र सजिलो पेमेन्टका कर्मचारीलगायत ८ जनालाई पक्राउ पनि गरेको छ । तस्करीको सुनका लागि १ खर्ब रुपैयाँभन्दा बढी रकम अनलाइनबाटै भुक्तानी भएको पाइएको सीआईबीले जनाएको छ ।

त्यस्तै पेवेल नेपाल प्रालिसँग ६१ अर्ब ५० करोड २७ लाख ९ हजार २३३ रूपैयाँ, सजिलो पे पेमेण्ट सर्भिसेज प्रालिसँग १९ अर्ब ४६ करोड २५ लाख ७३ ७८५ रूपैयाँ र अन्य प्रतिवादीहरूसँग ५ अर्ब १८ करोड १५ लाख ९१ ९६४.७६ रूपैयाँ बिगो मागदाबी गरिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।