गाडीभाडा बढाउने र राजधानीमा रात्री बस चलाउने सरकारको निर्णय रातारात फिर्ता

यातायात व्यवस्था विभागले गाडीभाडा बढाउने, काठमाडौंमा रात्रीकालिन बस सञ्चालन गर्ने तथा दिउँसोको समयमा चक्रपथभित्र मालबाहक सवारीसाधन प्रवेशमा रोक लगाउने सरकारको निर्णय तत्काल लागू नहुने जनाएको छ ।

यस अघि यी तीनवटै निर्णय असार १ गतेदेखि लागु हुने घोषणा गरिएको थियो । थप अध्ययनको आवश्यकता रहेको भन्दै सरकारले यी तीन महत्वपूर्ण निर्णय फिर्ता लिएको हो । अर्को सूचना प्रकाशित नभइञ्जेलसम्मका लागि निर्णय फिर्ता लिइएको विभागले जनाएको छ ।

सरकारले देशभरका सवारी रुटहरुको गाडीभाडा बढाउने, काठमाडौंमा रात्रीकालिन बस सञ्चालन गर्ने तथा दिउँसोको समयमा चक्रपथभित्र मालबाहक सवारीसाधन प्रवेशमा रोक लगाउने तीनओटै निर्णय लागु नहुने स्पष्ट पारेको छ ।

विभागले बिहीबार सार्वजनिक यातायातको भाडादरमा १२ देखि २० प्रतिशतसम्म वृद्धिको निर्णय सार्वजनिक गरेको थियो । भाडा वृद्धिको निर्णयसँगै उसले देशभरका लामो तथा छोटा दूरीका गन्तव्यहरुमा परिमार्जित भाडादरको सूचि समेत सार्वजनिक गरिसकेको थियो ।

सरकारले काठमाडौं उपत्यकामा रात्रीबस चलाउने र चक्रपथभित्र मालबाहक साधनमा प्रवेश रोक लगाउने निर्णय केही समय अघि नै गरेको हो भने गाडीभाडा बढाउने निणर्य हिजो दिउँसोमात्रै गरेको थियो ।

जनस्तरबाट सरकारको तीव्र आलोचना हुन थालेपछि विदेश भ्रमणमा रहेका प्रधानमन्त्री केपी शर्मा ओलीको आदेशमा यातायात व्यवस्था विभागर्ले निर्णय फिर्ता लिएको हो ।