अमेरिकामा बस्ने नेपालीहरुको सबैभन्दा पुरानो संस्था एएनएको अध्यक्षमा खगेन्द्र अधिकारी चयन 

नेपालबाट अमेरिका गई बसोबास गर्ने नेपालीहरुको सबैभन्दा पुरानो संस्था एशोसियशन अफ नेप्लिज ईन अमेरिकाज अर्थात एएनएको अध्यक्षमा समाजसेवी खगेन्द्र अधिकारी चयन हुनुभएको छ ।

यसअघि संस्थाको बरिष्ठ उपाध्यक्ष रहनु भएका अधिकारीले अब संस्थालाई नयाँ सोचले अगाडि बढाउने अठोटका साथ अध्यक्षको जिम्मेवारी सम्हाल्नु भएको बताईएको छ ।

पुरानो कार्य समितिको समयावधि जुलाई ४ मा सकिएसँगै अधिकारीसहित नयाँ बोर्डलाई ट्रष्टीहरुको बैठकले अध्यक्ष चयन गरेको हो ।

कोेरोना महामारी र असहज अबस्थाका कारणले चुनाव समितिका पदाधिकारीले राजीनामा गरेपछि ट्रष्टीहरुको बैठकले नयाँ निर्णय लिएको एएनएका ट्रष्टीहरुको तर्फबाट अम्बिाकाप्रसाद अधिकारीले जनाउनु भएको छ । खगेन्द्र अधिकारीले अहिले अन्तरिम अध्यक्षको मात्र जिम्मेवारी लिनु भएको र उहाँसहितको बोर्डको कार्यकाल डिसेम्बर ३१ सम्म रहने जनाईएको छ ।

निवर्तमान अध्यक्ष मेदिनी अधिकारीलाई संस्थाको प्रगतिका लागि गर्नु भएको योगदानका लागि धन्यबाद ज्ञापन गरिएको छ ।

एनएनए सन् १९८३ मा स्थापना भएको नेपालीहरुको संस्था हो । यति लामो समयसम्म निरन्तर क्रियाशील नेपालीहरुको पुरानो संस्थामा एएनए नै भएको बताईन्छ ।

अमेरिकामा दर्जनौ संस्थाहरु भए पनि सक्रियतापुर्वक सबैलाई समेटेर काम गर्नेमा एएनएले भुमिका खेल्दै आएको छ । अधिकारीको नेतृत्वमा एएनएले अरु नेपाली संस्थाहरुसँग सहकार्यमा जोड दिदै नेपालीहरुको हकहित सुरक्षा र बिकासका लागि अरु प्रभावकारी भुमिका खेल्ने अपेक्षा गरिएको छ ।