वर्षाका कारण अवरुद्ध सडक दसैँअघि नै सञ्चालनमा आउने

काठमाडौँ । वर्षाका कारण गत असारदेखि सवारीसाधन आवतजावत रोकिएको बकैया गाउँपालिका–६ सुदादेखि ज्यामिरेसम्मको बाटो दसैँअघि नै सञ्चालनमा ल्याउने गरी मर्मत गर्न थालिएको छ ।

वर्षाको समयमा उक्त सडकखण्डमा पर्ने ज्यामिरे खोलामा पानीको बहाव बढ्नुका साथै ठाउँठाउँमा पहिरो खसेर बाटो भत्केका कारण सवारीसाधन सञ्चालन हुनसकेको थिएन । उक्त सडकखण्डको हाल सरसफाइ तथा मर्मत सुरु गरिएको छ ।

सुदाबाट करिब १२ किलोमिटर दूरीको सडक अवरुद्ध हुँदा यस क्षेत्रका ज्यामिरेसहित गढवान, तिखुली, जसपालका बासिन्दा समस्यामा परेको गाउँपालिकाका उपाध्यक्ष भक्तबहादुर खत्रीले जानकारी दिए।

बाटो सहज नहुँदा ज्यामिरे क्षेत्रमा जमिन चिराचिरा परेर समस्यामा परेका स्थानीयका लागि राहत सामग्री पुर्याउन असहज भएको उनको भनाइ छ ।