संगीत क्षेत्रमा नयाँ प्रतिभाका लागि एपीवानमा अर्को मञ्च, सुरु भो ‘द म्युजिकल मेडिसन शो’

अन्तर्राष्ट्रिय स्तरका फ्रेन्चाइज शोको सफलताबाट ख्याती कमाएको एपीवान एचडी टेलिभिजनले संगीत क्षेत्रमा नयाँ प्रतिभाका लागि अर्को मञ्च दिएको छ । सुगम संगीतको क्षेत्रमा नयाँ प्रतिभाको खोजी गर्ने उद्देश्यले एपीवान टेलिभिजनमा गत माघ १० गते देखि ‘द म्युजिकल मेडिसिन शो’ सुरु भएको हो ।

चर्चित गायक दीपक वज्राचार्य र उनकी सुपुत्री चेरिसा वज्राचार्यले सञ्चालन गर्ने यो शोमा गायन क्षमता भएपनि विभिन्न कारणले अवसर नपाएका प्रतिभाहरुलाई अवसर दिइने एपीवानले जनाएको छ ।

कार्यक्रमका निर्माता एवं एपिवान टेलिभिजनका निर्देशक सुरेश पौडेलले नेपाल आइडल, वुगी वुगी, लोक स्टार जस्ता प्रतिभामा आधारित मञ्च सफल पारिसकेको टेलिभिजनले ल्याएको द म्युजिकल मेडिसिन शो नवप्रतिभाको साझा डबली बन्ने अपेक्षा राखिएको बताए ।

यो कार्यक्रम सुगम संगीतको क्षेत्रमा महत्वपूर्ण अध्याय हुने उनको विश्वास छ ।

तीन भागमा विभाजन गरेर सञ्चालन गरिने कार्यक्रमको पहिलो खण्डमा नयाँ र पाका पुस्ताबीचको विविधता समेट्ने गरिएको छ भने दोस्रो खण्डमा ‘अभावको प्रभाव’ नामक अवसरबाट बञ्चितहरुलाई नयाँ मञ्चमा ल्याउने प्रयासको प्रस्तुति रहने गर्छ । कार्यक्रमको अन्तिम तथा तेस्रो खण्डमा यसकै नाम अनुसार म्युजिकल मेडिसिन भन्ने सेगमेन्ट समावेश गरिएको छ ।

युवापुस्तामाझ निकै लोकप्रिय गायक दीपक व्रजचार्य र चेरिसाको यो प्रस्तुति सांगेतिक दुनियाँका पुराना र नयाँ पुस्ताबीचको पुल बन्ने अपेक्षा समेत गरिएको छ ।
अन्नपूर्ण मिडिया नेटवर्क तथा एपीवानका अध्यक्ष क्याप्टेन रामेश्वर थापाले युवा पुस्तामा रहेको प्रतिभा प्रष्फुटन गराउने एपीवानको मानक उद्देश्य अनुसार नै यो कार्यक्रम ल्याइएको बताए । कार्यक्रम मार्फत सांगेतिक क्षेत्रमा नयाँ आयामको खोजी गर्न टेवा पुग्ने उनको विश्वास छ ।

लोकप्रिय कलाकारसँगको सहकार्यमा सन्चालनमा आएको कार्यक्रमले नेपाली टेलिभिजन क्षेत्रमा नयाँ आयाम विकास गरेको एपीवान टेलिभिजनका कार्यकारी उपाध्यक्ष राजेन्द्र शाक्यले बताए । कार्यक्रम प्रत्येक शनिबार बेलुका ९ बजेदेखि १० बजेसम्म प्रसारण भइरहेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।