शेयर बजारमा ६० अंकको गिरावट, ६ अर्ब बढीको शेयर किनबेच

शेयर बजार सूचक मापक नेप्से मंगलबार पुनः ६० अंकले घटेको छ । बिहीबार ४४ र आइतबार ८० अंकको गिरावटपछि सोमबार ४० अंक बढीको सुधार देखिएको बजारले मंगलबार पुनः ओरालो बाटो समातेको हो ।

मंगलबार नेप्सेमा उच्च अंकको गिरावट आएपनि सोमबारको तुलनामा कारोबार रकम भने ४२ करोडले बढेको छ । यसदिन २०८ कम्पनीको १ करोड ३१ लख ६ हजार ७३८ कित्ता शेयर ६४ हजार ७८७ पटक खरीद बिक्री हुँदा कारोबार रकम ६ अर्ब ११ करोड ९६ लाख ३८ हजार ६६९ रुपैयाँ पुगेको छ ।

मंगलबार नेप्से सूचक ५९.७० अंकले घटेर २ हजार ४५५ दशमलव ३३ बिन्दुमा झरेको छ भने ठूला कम्पनीहरु सूचीकृत सेन्सेटिभ इन्डेक्स पनि ९.८० अंकले घटेर ४४३ अंकमा रोकिएको छ ।

शेयर बजारमा उच्च गिरावट आएसँगै मंगलबार मात्रै शेयर बजारमा रहेको लगानीकर्ताको सम्पत्ति मापक सूचक बजार पूँजीकरण ८२ अर्ब ३७ करोड रुपैयाँले घटेको छ । सोमबार ३४ खर्ब ६४ अर्ब ३५ करोड रुपैयाँ कुल बजार पूँजीकरण रहेकोमा मंगलबार ३३ खर्ब ८२ अर्ब ८७ करोडमा खुम्चिएको हो ।

साल्ट ट्रेडिङ्ग र चन्दा्गिरी हिल्सको शेयरमूल्यमा सकारात्मक सर्किट लाग्दा यी कम्पनी सूचीकृत ब्यापार र होटल तथा पर्यटनमुलक सूचक मंगलबार रहेका छन् । बाँकी ११ उपसमहुको सूचक ऋणात्मक बनेका छन् । आजको बजारमा जीवन बीमा, उत्पादनमुलक, निर्जीवन बीमा, लघुवित्त, बैंकिङ्ग, विकास बैंक र हाइड्रोपावरको सूचक २ प्रतिशतभन्दा बढीले घटेको छ ।

यसदिन एशियन लाइफ इन्स्योरेन्सको सबैभन्दा धेरै २८ करोड २७ लाख रुपैयाँको शेयर खरीद बिक्री हुँदा निफ्रा, नेपाल बैंक, शिखर इन्स्योरेन्स कुमारी बैंक, र नेपाल लाइफको पनि २० करोडभन्दा बढीको शेयर कारोबार भएको छ ।

मंगलबारको बजारमा साल्ट ट्रेडिङ्ग र चन्दा्गिरी हिल्सको शेयरमूल्यमा सकारात्मक सर्किट लाग्दा हिमालयन पावर पार्टनरको शेयरमूल्य पनि करिब ९ प्रतिशतले बढेको छ । एनआईडिसिएल, गुडविल फाइनान्स र मेरो माइक्रोफाइनान्सको शेयरमूल्य पनि सामान्य बढेको छ ।

यसदिन नेपाल हाइड्रो डेभलोपर कम्पनीको शेयरमूल्य ७ प्रतिशत बढीले घट्दा कर्पोरेट डेभलपमेन्ट बैंक, र सिनर्जी पावरको शेयरमूल्यमा पनि ६ प्रतिशत धेरैको गिरावट देखा पर्यो ।

साधना लघुवित्त, मन्जुश्री फाइनान्स, लक्ष्मी इक्वीटी फण्ड, मिर्मिरे लघुवित्त, सूर्योदय लघुवित्त, सनराइज फस्ट र स्वाभिमान लघुवित्तको शेयरमा लगानी गरेकाले पनि मंगलबारको बजारबाट ५ प्रतिशतभन्दा धेरैले गुमाएका छन् ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।