उचित बैंकिङ्ग सेवा नपाएमा अनलाइनबाटै राष्ट्र बैंकमा गुनासो दर्ता गर्न सकिने

नेपाल राष्ट्र बैंकले उचित बैंकिङ्ग सेवा उपलब्ध नगराउने बैंक तथा वित्तीय संस्था विरुद्ध उजुरी गर्न सकिने नयाँ वेव पोर्टल संचालनमा ल्याएको छ ।

केन्द्रीय बैंकले बैंक तथा वित्तीय संस्था र विभिन्न प्रकारका संस्था, एजेण्ट, भुक्तानी सेवा सञ्चालक, भुक्तानी सेवा प्रदायकसँग सेवा लिदाँ कुनै गुनासो भए अनलाइनबाटै नेपाल राष्ट्र बैंकलाई जानकारी गराउन सक्ने व्यवस्था गरेको हो ।

राष्ट्र बैंकले वित्तीय ग्राहक संरक्षणका लागि सञ्चालनमा ल्याएको वेव पोर्टलमार्फत् राष्ट्र बैंकमा गुनासो गर्न पाइने भएको हो ।

‘नेपाल राष्ट्र बैंकबाट इजाजतपत्र/अनुमति प्राप्त गरि वित्तीय मध्यस्थता सेवा प्रदान गरिरहेका बैंक तथा वित्तीय संस्था र विभिन्न प्रकारका संस्था÷एजेन्टले ग्राहकसँग निष्पक्ष, विश्वसनीय, र पारदर्शी ढंगबाट बैंकिङ क्षेत्रको व्यवसायिक मूल्य र मान्यता एवं नीति निर्देशनको अधीनमा रही ग्राहकको हितलाई प्राथमिकतामा राखी वित्तीय मध्यस्थता सेवा प्रदान गर्ने/गराउने कार्यको सुनिश्चितता गरी वित्तीय ग्राहकको हित संरक्षण गर्न यस पोर्टल निर्माण गरिएको छ,’ राष्ट्र बैंकले भनेको छ ।

पछिल्लो समय डिजिटल भुक्तानी प्रचलनमा आएपछि ग्राहकहरुका गुनासोहरु समेत बढी रहेका छन् । विशेषगरी एसएमएस बैकिङ्ग, एटिएम सेवा तथा बैंकहरुले उपलब्ध गराएका अनलाइन सेवाहरुमा गुनासा बढेको थिए ।

वित्तीय ग्राहकलाई वित्तीय सेवा प्रदायकबाट हुने असहयोग, ढिलासुस्ती, बेवास्ता, पक्षपात, गैरजिम्मेबारी, लापरवाही, झुठो, गलत सूचना संप्रेषण, अपारदर्शी कारोवार जस्ता नकारात्मक व्यवहारलाई न्युनीकरण गर्न गुनासो पोर्टल बनाइएको राष्ट्र बैंकको भनाई छ ।

बैंक तथा वित्तीय संस्थाहरुले प्रदान गर्ने सेवाको बारेमा गुनासो दर्ता गर्नको लागि  http://gunaso.nrb.org.np पोर्टलमा गएर गुनासो दर्ता गर्नुपर्छ । यसरी गुनसो दर्ता गरेपछि गुनासो दर्ता भएको जानकारी र दर्ता नं. इमेल मार्फत प्राप्त हुनेछ ।

गुनासो दर्ता नम्बरको सहयोगले पेश गरिएको गुनासोको स्थिति थाहा पाउन सकिने र दर्ता भएको गुनासोको अन्तिम निर्णय इमेल मार्फत जानकारी गराउने व्यवस्था राष्ट्र बैंकले मिलाएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।