सत्तरी करोड सत्तरी लाखको आईपीओ आउनेः चार कम्पनीले मागे बोर्डसँग बिक्री अनुमति

निकट भविष्यमा सर्वसाधारणहरुलाई सेयर जारी गर्न थप चार हाइड्रोपावर कम्पनीहरुले ७० करोड ७० लाख रुपैयाँ बराबरको प्रारम्भिक सार्वजनिक निष्काशन (आईपीओ) जारी गर्ने अनुमित मागेका छन् ।

नेपाल धितोपत्र बोर्डका अनुसार सुपरमाई हाइड्रोपावर लिमिटेड, सान्जेन जलविद्युत कम्पनी लिमिटेड, इस्टर्न हाइड्रोपावर लिमिटेड र एशियन हाइड्रोपावर लिमिटेडले आईपीओ निष्काशनका लागि पूँजीबजारको नियामक निकाय नेपाल धितोत्र बोर्डसँग अनुमति मागेका हुन् ।

बोर्डका अनुसार सुपरमाई हाइड्रोपावर लिमिटेडले सर्वसाधारण र स्थानीय बासिन्दाका लागि प्रतिसेयर १०० रुपैयाँ अंकित दरका १० लाख कित्ता, सान्जेन जलविद्युत कम्पनी लिमिटेडले स्थानीय बासिन्दाका लागि ३६ लाख ५० हजार कित्ता, इस्टर्न हाइड्रोपावर लिमिटेडले सर्वसाधारण र स्थानीय बासिन्दाका लागि १२ लाख ४० हजार कित्ता र एशियन हाइड्रोपावरले सर्वसाधारण र स्थानीय बासिन्दाका लागि ११ लाख ८० हजार कित्ता सेयर जारी गर्न अनुमति मागेका हुन् ।

आईपीओ जारी गर्नका लागि सुपरमाई हाइड्रोपावर लिमिटेड र सान्जेन जलविद्युत कम्पनी लिमिटेडले मंसिर २० गते, इस्टर्न हाइड्रोपावर लिमिटेडले मंसिर २४ गते र एशियन हाइड्रोपावर लिमिटेडले पुस ११ गते निवेदन दिएको बोर्डले जनाएको छ ।

सुपरमाई हाइड्रोपावर लिमिटेडको धितोपत्र निष्काशन तथा बिक्री प्रबन्धकमा सानिमा क्यापिटल लिमिटेड, सान्जेन जलविद्युत कम्पनी लिमिटेडको नागरिक लगानी कोष तथा इस्टर्न हाइड्रोपावर लिमिटेड र एशियन हाइड्रोपावर लिमिटेडको धितोपत्र बिक्री प्रबन्धकमा एनएमबि क्यापिटल लिमिटेड रहेको छ ।

सर्वोत्तम सिमेन्टको सेयर प्रकरणमा मुछिएपछि तत्कालीन बोर्डका अध्यक्ष भिष्मराज ढुङ्गानालाई कार्तिका १ गते सम्पन्न मन्त्रिपरिषदका् बैठकले बर्खास्त गरेको थियो । कार्तिकदेखि धितोपत्र बोर्डको अध्यक्ष नहुँदा सार्वजनिक निष्काशन गर्न अनुमति मागेका अन्य २५ कम्पनीहरु समेत बोडृको पाइपलाइनमा रहेका छन् । यी कम्पनीहरुले ६ अर्ब ८० करोड ७६ लाख ४०० रुपैयाँ बराबरको आईपीओ बिक्री गर्न बोर्डको अनुमति कुरिरहेका छन् ।

पछिल्लो समय अनुमति मागेका थप ४ सहित अब २९ कम्पनीहरुको ७ अर्ब ५१ करोड ४६ लाख ४०० रुपैयाँ बराबरको आईपीओ बोर्डको पाइनलाईनमा अनुमतिको पर्खाइमा पुगेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।