नेको इन्स्योरेन्सको बीमाशुल्क घटेपनि खुद नाफा बढ्यो, साढे १७ करोड कमायो

नेको इन्स्योरेन्सले चालु आवको दोस्रो त्रैमास अर्थात २०७९ पुससम्मममा खुद बीमशुल्क ११.४६ प्रतिशतले घटेपनि खुद नाफा १७.२० प्रतिशतले वृद्धि गरेको छ ।  शनिबार प्रकाशित अपरिष्कृत वित्तीय विवरण अनुसार कम्पनीको खुद नाफा १५ करोड २ लाख २५ हजार रुपैयाँबाट बढेर १७ करोड ६० लाख ६५ हजाररुपैयाँ आर्जन गरेको हो । नाफामा सुधार गरेको कम्पनीको निर्जीवन बीमा व्यवसाय भने संकुचित बनेको छ ।

पुस मसान्तसम्ममा खुद बीमा शुल्क आर्जन ११.४६ प्रतिशत र कुल बीमा शुल्क आर्जन भने १.८९ प्रतिशतले घटेको तथ्याङ्क छ । कम्पनीले पुससम्म ८७ करोड २५ लाख ८० हजार रुपैयाँ खुद बीमाशुल्क संकलन गरेको छ । गत आवको सोही अवधिमा खुद बीमाशुल्क ९८ करोड ५४ लाख ९४ हजार रुपैयाँ रहेको थियो । यस्तै कम्पनीको कुल बीमाशुल्क संकलन १ अर्ब ५५ करोड ५८ लाखमा संकुचित बनेको छ । गत आवको सोही अवधिमा कम्पनीको कुल बीमाशुक संकलन १ अर्ब ५८ करोड ५७ लाख रुपैयाँ थियो ।

समीक्षा अवधिमा कम्पनीले पुनर्बीमा कमिशन वापत १६ करोड २ लाख ३० हजार रुपैयाँ आम्दानी गरेको छ । गत आवको सोही अवधिमा १६ करोड ६१ लाख ३४ हजार रुपैयाँ रहेकोमा ५९ करोडले घटेको हो ।

चुक्ता पूँजी २ अर्ब १ करोड २३ लाख ६१ हजार रुपैयाँ रहेको यस इन्स्योरेन्सको वार्षिक प्रतिसेयर आम्दानी १७ रुपैयाँ ५० पैसा कायम भएको छ । पुस मसान्तसम्ममा इन्स्योरेन्सको प्रति सेयर नेटवर्थ १९२ रुपैयाँ ५ पैसा र मूल्य आम्दानी अनुपात ५१.१६ गुणा छ ।

कम्पनीको जगेडा कोषको आकार ५३ करोड ५६ लाख ६४ हजारबाट घटेर ३२ करोड १६ लाख ५४ हजार रुपैयाँ झरेको छ । त्यस्तै, इन्स्योरेन्सको बीमा कोष १ अर्ब १७ करोड ४५ लाखबाट बढेर १ अर्ब ४४ करोड ७५ लाख रुपैयाँ र महाविपत्ती कोष ७ करोड ६२ लाख ५० हजारबाट बढेर ८ करोड ३२ लाख ७९ हजार रुपैयाँ सञ्चित भएको छ ।

यस अवधिमा कम्पनीले ५३ करोड ४१ लख रुपैयाँ दीर्घकालीन कर्जा, ४ अर्ब १० करोड १७ लाख रुपैयाँ अल्पकालीन कर्जा लगानी गरेको छ । कम्पनीले लगानी कर्जा तथा अन्यबाट १३ करोड ९९ लाख ६६ हजार रुपैयाँ आम्दानी गरेको छ ।

कम्पनीले १ लाख ५४ हजार ६२० वटा बीमालेख जारी गरेकोमा ४३ हजार ७६४ वटा नवीकरण भएका छन् । पुससम्म कम्पनीले ५ हजार १८३ वटा दाबीमा ६८ करोड ६ लाख रुपैयाँ भुक्तानी गरेको छ भने १० हजार १३१ वटा दाबीको १ अर्ब ७८ करोड ७५ लाख रुपैयाँ बराबरको भुक्तानी गर्न बाँकी रहेको छ ।
गत आवको पुसमा कम्पनीले १ लाख ६५ हजार २५६ वटा बीमालेख जारी गरेकोमा ३७ हजार ५०२ वटा नवीकरण भएका थिए । कम्पनीको कुल बीमाशुल्क आर्जन १ अर्ब ५८ करोड ५७ लाख थियो । गत पुससम्म कम्पनीले ४ हजार १९९ वटा दाबीमा ५९ करोड ६ लाख रुपैयाँ भुक्तानी गरेको थियो भने ९ हजार ६५ वटा दाबीको २ अर्ब ३९ करोड ८९ लाख रुपैयाँ बराबरको भुक्तानी गर्न बाँकी रहेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।