मिर्मिरे लघुवित्त राष्ट्रियस्तरमा स्तरोन्नति हुँदै, स्वेडालाई गाभेर असार २१ देखि एकिकृत कारोबार

राष्ट्रियस्तरमा स्तरोन्नति हुने क्रममा रहेको मिर्मिरे लघुवित्तले धादिङको स्वेडा लघुवित्तलाई प्राप्ति गरे पश्चात असार २१ गतेदेखि एकिकृत कारोबार संचालन गर्ने भएको छ ।

धादिङको धार्केमा केन्द्रिय कार्यालय रहि १० जिल्ला कार्यक्षेत्र रहेको स्वेडालाई प्राप्ति गर्ने प्रस्ताव गत वैशाख १७ गते सम्पन्न विशेष साधारण सभाबाट पारित गराएको थियो ।

गत पुस २७ गते एक्वीजिशन सम्झौता गरेको बनेपाको मिर्मिरे लघुवित्त वित्तीय संस्था र धादिङको स्वेडा लघुवित्तले ०७७ असार ५ गते राष्ट्र बैंक र असार ७ गते कम्पनी रजिष्ट्रारको कार्यालयबाट एक्वायरको अन्तिम स्वीकृति लिईसकेका छन् ।

मिर्मिरेले स्वेडालाई प्रतिकित्ता ७५ रुपैयाँमा खरिद गरेको हो। प्राप्ति पश्चात यी दुई कम्पनीकोे मिर्मिरे लघुवित्त वित्तीय संस्था लिमिटेडको नामबाट एकिकृत कारोबार हुनेछ भने संस्थाको केन्द्रीय कार्यालय बनेपामा रहने छ ।

मिर्मिरेको चुक्ता पूँजी १८ करोड ६७ लाख ४० हजार २८० रुपैयाँ छ भने स्वेडाको चुक्ता पूँजी १ करोड ३८ लाख रुपैयाँ छ।

स्वेडालाई प्राप्ति पछि राष्ट्रियस्तरमा स्तरोन्नति हुने क्रममा रहेको मिर्मिरे लघुवित्तले एक बराबर एकको अनुपातमा हकप्रद निष्काशन गर्ने योजनामा छ ।

यस्तै मिर्मिरेले नागबेली लघुवित्तलाई प्राप्ती गर्ने सम्झौता समेत गरेको छ। मिर्मिरेले नागबेलीलाई आफुमा गाभ्ने प्रस्ताव पारित गर्न असार २० गत विशेष साधारण सभा बोलाएको छ ।

काभ्रेपलान्चोकको बनेपामा केन्द्रिय कार्यालय रहेको मिर्मिरेले झापाको बिर्तामोडमा केन्द्रिय कार्यालय रहेको नागबेली लघुवित्तलाई प्राप्त गर्ने प्रस्ताव उक्त विशेष साधारणबाट पारित हुनेछ ।