संसद पुनस्थापनको अन्यौलतासँगै ‘प्रफिट बुकिङ’ गर्ने हाबी हुँदा शेयर बजारमा तीब्र गिरावट

राजनितिक अस्थिरताका बीच यो साता संसद पुन:स्थापना हुन्छ वा हुँदैन भन्ने अन्यौलताको असर शेयर बजारमा परेको छ ।

संसद पुनस्थापना हुन्छ कि हुँदैन र भई हाल्यो भने प्रधानमन्त्री केपी ओलीको अर्को ‘मुभ’ के हुन्छ भन्ने अन्यौलताको असर शेयर बजारमा परेको छ । यस्तो अवस्थामा लगानीकर्ताहरुले धमाधम ‘प्रफिट बुक’ गरिरहेका छन् ।

निरन्तर बढिरहेको बजार करेक्सनको बाटोमा रहेको भन्दै ठुला लगानीकर्ताहरुले धमाधम लगानी निकाल्न थालेको बुझाई आम लगानीकर्तामा परेको छ । संकट लाग्ने हल्लाका कारण एकाएक बजारमा तिब्र गिरावट आएको हो ।

मंगलबार ८८ अंकसम्मको गिरावट आएको बजार अन्तिम समयमा २१ अंकको गिरावटमा बन्द भएको छ । मंगलबार नेप्से २ हजार ६०७ मा खुलेकोमा २ हजार ५१९ बिन्दुसम्म ओर्लिएको थियो । योसँगै बजार परिसूचक नेप्से २६८६.५१ अंकमा ओर्लिएको छ ।

निर्जीवन बीमा कम्पनी समुहमा सबैभन्दा धेरै गिरावट आएको बजारमा वाणिज्य बैंक समुहमा भने सामान्य गिरावट देखिएको छ । जसका कारण बजारको तीब्र गिरावट कम भएको देखिन्छ । मंगलबार व्यापार समुहमा मात्र सकरात्मक देखिएको बजारमा बाँकी सबै उपसमुहमा गिरावट आएको छ । 

नेप्से घटेसँगै लगानीकर्ताको सम्पत्ति मापक कुल बजार पूँजीकरण ३५ खर्ब ६४ अर्ब १० करोडमा झरेको छ । सोमबारको तुलनामा बजार पूँजीकरण २९ अर्ब १५ करोडले घटेको हो ।

प्रि ओपनिङ सेसनदेखि नै ओरालो लागेको बजार नियमित सेसनमा भने ५ अंकसम्म सुधारिएको थियो । तर त्यो सुधार केही मिनेट पनि टिक्न नसकी तीब्र गतिमा बजार ओरालो लागेको थियो । ८४ अंकको गिरावट आउँदा शेयर मूल्य सस्तो भएपछि खरिद चाप आउन थाले पछि क्रमिक रुपमा गिरावटको क्रम घटेको थियो ।

नेपाल इन्फ्रास्ट्रक्चर बैंकको शेयर सर्वाधिक कारोबार, सबैभन्दा धेरै कारोबार रकम र सबैभन्दा धेरै कारोबार संख्याका आधारमा पहिलो स्थानमा परेको छ । प्रतिकित्ता शेयर मूल्यमा मंगलबार मात्र १३२ रुपैंयाको अन्तर देखिएको कम्पनीको शेयर मूल्य १० प्रतिशतले बढेर कारोबार भएकोमा केही बेरमा नै १० प्रतिशतले घटेर कारोबारमा आएको थियो ।

मंगलबार बजार निरन्तर ओरालो लाग्दा २ सय ५ कम्पनीका १ करोड ७७ लाख १४ हजार ९१२ कित्ता शेयर ८३ हजार ३५७ पटक किनबेच हुँदा ८ अर्ब ५६ करोड १५ लाख ३९ हजार रुपैंयाको कारोबार भएको छ ।

बजार निरन्तर ओरालो लाग्दा पनि मंगलबार ५० कम्पनीको शेयर मूल्य बढेको छ । जसमा नेपाल फाइनान्स, अपि पावर कम्पनी, लिबर्टी इनर्जी लगायत कम्पनीको शेयर मूल्य धेरै बढेको छ । धेरै शेयर मूल्य घट्ने कम्पनीको शीर्षस्थानमा नेपाल इन्फ्रास्ट्रक्चर बैंक छ भने आँखुखोला जलविद्युत कम्पनी, युनिलिभर नेपाल लगायतका कम्पनी रहेका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।